A actividade turística en Galicia durante o pasado mes de xullo alcanzou os 415.759 viaxeiros, o que representa un incremento do 1,41% sobre o mesmo mes do ano anterior, segundo os primeiros datos do Instituto de Estudos Turísticos de Galicia dependente da Consellería de Innovación e Industria.

Estes datos revelan que os niveis de actividade turística no país manteñen unha tendencia de crecemento, se ben se observa unha relativa contención nos incrementos rexistrados nos últimos meses, polo que o primeiro semestre do ano pechouse cun aumento acumulado do 0,60%.

No mes de xullo o grao de ocupación en hoteis situouse no 62,84% no conxunto do país, se ben como xa ven ocorrendo tradicionalmente existen diferenzas salientables entre as provincias de Lugo e Ourense (con niveis de ocupación do 45,56 e o 49,20%, respectivamente) e as da Coruña e Pontevedra (neste caso con niveis de ocupación do 69,99 e 67%, respectivamente).

Festival interceltico de lorient

Galicia será a convidada de honra na vindeira edición do Festival Intercéltico de Lorient 2009

O gaiteiro galego Pablo Devigo foi o gañador do concurso de gaitas que se celebrou o domingo. Este ano Gales foi o convidado de honra, posto que no 2009 ocupará Galicia.

Delegacións de Gales, Irlanda, Escocia, Acadia, Bretaña, Asturias e Galicia e mais dos países convidados Canadá e Australia asisten esta semana á 38 Edición do Festival Intercéltico de Lorient, que se celebra na cidade bretona entre o 1 e o 10 de agosto. O festival interlcéltico de Lorient constitúe unha cita ineludible para os amantes da música folk e da cultura celta e cada ano é visitado por milleiros de persoas que asisten aos espectáculos gratuítos que se celebran nos pavillóns dos diferentes territorios convidados e mais aos espectáculos de pago que albergan os diferentes recintos da cidade.
O stand xestionado pola Dirección Xeral de Turismo a través de Turgalicia recibiu nestes primeiros días a milleiros de persoas atraídos pola información sobre o país que se distribúe no mesmo e mais polas actuacións de grupos galegos que se celebran in situ. Doutra parte, o recinto galego contén unha parte dedicada ao Obradoiro de Gaitas Seivane no que os visitantes poden admirar as características da gaita galega e aprender os detalles da súa fabricación e utilización. Galicia tamén ten en Lorient unha representación da súa gastronomía a través dun restaurante no que os asistentes ao festival poden degustar polbo á feira, licor café ou torta de Santiago por módicos prezos. O grande éxito que colleita o restaurante galego fai que sexa dos máis visitados do recinto feiral. Varios grupos de intérpretes de música tradicional manteñen a animación no stand e nas inmediacións do mesmo, onde tamén actúan ao caer a tardiña grupos de danza tradicional que amosan aos paseantes a cultura popular galega.

Concurso de gaitas.

Todos os anos se celebra durante as primeiras xornadas do festival un concurso de gaitas en dúas quendas no que participan na primeira xornada Galicia, Asturias e Bretaña e na segunda Irlanda, Escocia e Bretaña. O gañador do concurso da primeira xornada foi o gaiteiro galego Pablo Devigo.

Pablo Devigo actuou tamén na recepción que o alcalde de Lorient ofreceu aos representantes das delegacións participantes. O director xeral de Turismo, Rubén Lois, foi o encargado de saudar ao resto das delegacións asistentes e foi recibido polo alcalde da cidade. Galicia será o vindeiro ano a convidada de honra da 39 edición do festival e isto implica que terá un recinto de maiores dimensións no eixo central do recinto feiral para dar a coñecer a cultura do noso país na Bretaña a todos aqueles que asistan ao evento o vindeiro ano.

Nesta edición participaron en representación da música celta galega grupos como Quempallou ou Mutenrohi, que rexistraron unha gran acollida nos seus concertos. Tamén actuaron nesta edicións outras agrupacións como Celtas Cortos, os míticos Moving Hearts ou Loreena MacKennitt.

A III edición do programa “Vai de Camiño”, organizado pola Consellería de Innovación e Industria a través da S.A. de Xestión do Plan Xacobeo, está a achegar até o mes de setembro as actuacións de 115 artistas galegos a outros tantos concellos do país.

O programa “Vai de Camiño” 2008, organizado pola S.A. de Xestión do Plan Xacobeo da Consellería de Innovación e Industria, continúa levando espectáculos e manifestación artísticas a concellos de toda Galicia polos que discorren os distintos camiños xacobeos. Esta semana a programación desenvolverase nas vilas de Dozón, Riós, Paderne de Allariz, Amoeiro, Verín, Boqueixón, Castrelo do Val e Vilariño de Conso, ao longo da Vía da Prata, e nas de Abadín e Trabada, no Camiño do Norte. O programa é o seguinte:

Dozón
Vía da Prata. Luns, 11 de agosto. Ás 20.00 h., na Praza do Concello, o espectáculo de novo circo “O Pequeno Circo dos Milagres”.

Riós
Vía da Prata. Martes, 12 de agosto. Ás 12.00 h., no Castrelo de Abaixo, música tradicional a cargo dos requinteiros “A Gaita de Sarandón”.

Paderne de Allariz
Vía da Prata. Mércores, 13 de agosto. Ás 21.00 h., na Praza do Concello, tocará a banda de música de Antas de Ulla.

Amoreiro
Vía da Prata. Xoves, 14 de agosto. No Campo do Souto, ás 13.00 h., interpretación da banda de música de Vilalba.

Verín
Vía da Prata. Xoves, 14 de agosto. Gran velada de música galega que comezará cos grupos de pasarrúas tradicionais Abelente e Ansuíña amenizando as rúas entre as 19 e as 21.30 h. Despois, ás 22.30 h. e na Praza de García Barbón, concerto da afamada gaiteira Susana Seivane e do grupo de Pepe Vaamonde, quinteto de música folk con dous discos no mercado.

Abadín
Camiño do Norte. Sábado, 16 de agosto. Na Área Recreativa de Gontán, ás 13.00 h., actuación da banda de música de Cambre.

Boqueixón
Vía da Prata. Sábado, 16 de agosto. Ás 22.00 h., na Casa de Cultura de Camporrapado, actuación do cuarteto tradicional Ruote.

Trabada
Camiño do Norte. Domingo 17 de agosto. Na Praza do Concello, ás 22.00 h., actuación do grupo tradicional Cantigas e Agarimos.

Castrelo do Val
Vía da Prata. Domingo, 17 de agosto. Ás 20.00 h., no Campo da Festa O Terrón, actuación do grupo de baile tradicional Donaire.

Vilariño de Conso
Vía da Prata. Domingo, 17 de agosto. Ás 19.30 h., na Praza do Concello, o grupo de novo circo “Cantares de Circo”.

Os interesados en acudir a estes ou outros espectáculos de Vai de Camiño poden consultar a programación e os seus posibles cambios en www.xacobeo.es.

Vai de Camiño

A terceira edición de “Vai de Camiño”, que está a desenvolverse dende o 30 de maio e durará ata o 30 de setembro, levará actuacións e espectáculos durante case todos os días do verán a 115 concellos galegos polos que pasan os distintos camiños xacobeos. O circuíto conta cun orzamento de 1,8 millóns de euros e inclúe espectáculos de música, danza, monicreques, animacións de rúa e maxia. A oferta é moi variada e trata de dar cabida ao máis representativo do panorama artístico galego actual, co que tamén se contribúe á potenciación da industria cultural e do espectáculo do país, xa que no conxunto da programación participan máis dun milleiro de profesionais do sector.